Já, var rétt í þessu að hringja austur á land og óska einum manni til hamingju með 25%-in úr öldinni við fremur dræmar undirtektir. En semsagt, fyrir 25 árum síðan, kaldan vetrarmorgun 1982 heilsaði lítill strákpjakkur heiminum, strák sem engum grunaði þá, að ætti eftir að leggja stund á vélstjórn seinna í lífinu. Ég man það eins og það hafi gerst í gær þegar ég fór í barnaskólann í fyrsta skipti og var á leið í kaffitíma, sem fór þannig fram að krakkarnir settust á óþægilegt þunnt teppi og drukku og borðuðu nestið sitt. Ég man að ég ráfaði þarna um líkt og nýfæddur bambi og var mér strax litið á frekar feiminn, feitlagin og útundan strák í horninu og tyllti ég mér því hjá honum og spurði hann hvað hann væri að drekka, "gagó" svaraði hann til, þannig hófst þetta hjá okkur sem hefur þróast úr því að vera nördar, sem söfnuðum flugum og ormum í krukkur og yfir í það að vera bestu gæsaskyttur S-þingeyjarsýslu. (reyndar að hans sögn eingöngu). Talsvert magn af vatni hefur runnið í sjóinn sinn síðan þetta var og er hann sem stendur að flýta fyrir álversframkvæmdum fyrir austan fjall, sem gengur svo ég þekki til, bara mjög vel. Maðurinn sem um ræðir hefur á sínum ferli kallað sig ´Alfreð Gíslason´ ´Jón Odd´ ´Casanova´ ´Larry Bird´ ´Ronald Koeman´og miklu fleiri nöfnum en hans raunverulega nafn er. En við óskum honum að sjálfsögðu til hamingju með daginn, já og reyndar Krissu líka, en hún er einmitt Kristjana Magnúsdóttir sem á afmæli sama dag og fyrrgreindur aðili.

En já, oft heyrir maður klisjur í stjórnmálamönnum fyrir kosningar og hverjar eru þær, jú, "við ætlum sko að bæta velferðarkerfð, menntakerfið, gera vel við aldraða, barnafólk hafi það betra" o.s.frv.o.s.frv. Lengst gekk þessi klisjuumræða nú í gær þegar íslandshreyfingin sagðist ætla að gera lífið skemmtilegra, já það er nú ekki ónýtt að kjósa flokk og fólk, sem ætlar að gera líf manns skemmtilegra. Þessi umræða minnir á "óháðu" umræðuna, þ.e. flokka sem aðhyllast einnig að "óháðu" fólki. Fyrir síðustu sveitastjórnarkosningar kom Samfylkingin held ég fyrst fram með framboð sitt merkt, "Samfylkingin og óháðir", svo fylgdu frammararnir, sjallarnir og vg í kjölfarið. Algerlega ómarktækt. Svo þegar svokallaðir "óháðir" aðilar sitja á listum fólks, því er ekki að neita að sú umræða fer ´nett´ í taugarnar á mér.

Ég lýsi því hér með yfir að ég er búinn að æla tvisvar sinnum vegna baugsmálsins, það hefur semsagt komið fyrir tvisvar að þegar þessi "setti ríkissaksóknari" Sigurður Tómas hefur birst á skjánum þá hef ég hlaupið inn á baðherbergi og ælt, í seinna skiptið náði ég því varla og þurfti ég að eyða góðum tíma í að bóna klósettsetuna hjá mér.

Íslendingar töpuðu fyrir spánverjum í gær 1-0 á mallorca í vægast sagt leiðinlegum leik hef ég heyrt. Landsliðsþjálfarinn okkar, ofmetni Skagfirðingurinn Eyjólfur Sverrison, sagði fyrir leikinn að verið væri að spila við íslenskar aðstæður, rok og rigningu. Reka Eyjólf og ráða Gauja kóng strax !