Þá er það ljóst, AC Milan urðu Evrópumeistarar í gærkvöldi með ósanngjörnum sigri á Liverpool. Já, hiklaust segi ég ósanngjörnum sigri vegna þess að Milan átti ekkert í leiknum, skoraði heppnismark á 45´mín, eða rétt áður en leikmenn gengu til búningsherbergja. Varðandi seinna markið hjá Inzagi, þá var reyndar lítið við því að segja, en reyndar verður að segjast sem svo að vörnin okkar átti kannski ekki sinn allra besta leik, og kom þar bersýnilega í ljós hversu öflugur, og vanmetin þáttur Sami Hyypia hefur verið undanfarin ár. Ástæða þess að hann er gagnrýndur, er sú einvörðungu að hann sé orðin svo hægur ! Menn geta ekki fundið neina aðra skýringu, en vegna þeirra gagnrýni höfum við haft innanborðs gríðarlega hæga leikmenn á tímabilinu, t.d. er hægt að nefna Zenden, Alonso, svo hef ég ekki tekið eftir þessum ofboðslega hraða sem Carragher ræður yfir. Auðvitað er þægilegt að koma með svona fullyrðingu fram núna eftir leik, en það er bara þannig að fólk með blindrastafi ætti auðvelt með að spila leikmann eins og Inzagi rangstæðan. Svo ákvað dómari leiksins að bæta við 3 mínútum, en þegar klukkan rétt slefaði yfir 92mín ákvað hann bara að hætta þessu, enda er þetta þjóðverjagerpi hálfviti. En jæja, þýðir ekkert að gráta vegna þessa leiks, stórir tímar framundan hjá klúbbnum og fyrsta heila tímabil liðsins framundan, þar sem þeir verða í eigu þeirra Gilletts og Hicks.

Hvað gerist í sumar - Hverjir fara - Hverjir koma ?

Fyrir nokkrum dögum, varð það ljóst að bæði Robbie Fowler og Jerzy Dudek kveðja Anfield í sumar. Ég mun sakna þeirra beggja virkilega mikið, enda báðir á sinn hátt einstakir leikmenn. Robbie Fowler auðvitað með tæplega 200 mörk í úrvaldsdeildinni á bakinu. Svo þakka ég Jerzy Dudek fyrir evróputitilinn fyrir 2 árum, í magnaðasta úrslitaleik í sögu meist.deildarinnar. En já, Mark Gonzalez kveður líka, sem og Bodjewin Zenden, sem er mjög gott ! Zenden er sá leikmaður Liverpool sem ég hef aldrei skilið að sé í sífellu í byrjunarliðinu ! Hann átti ágætis leik gegn Chelsea í seinni leiknum í undanúrslitunum, en þá er framlag hans til Liverpool síðan hann kom þangað, upptalið. Veit svosem ekkert með að selja Riise, en þátttaka hans í velflestum leikjum liðsins, er ávísun á metnaðarleysi. Hann er frekar takmarkaður leikmaður, ekkert sérstakur varnarmaður, á stundum mörk, og þau eru þá reyndar stundum falleg, en sóknarlega séð er hann bara allt í lagi, ekkert meira en það. Ég hef nú í gegnum tíðina verið aðdáandi Xabi Alonso, en svo virðist sem hann hefur eitthvað dalað, sendingarnar hjá honum, sem eiga að vera hans helsta vörumerki, hafa mistekist, skipti eftir skipti hjá honum í vetur. Ég nenni ekki að vera halda enn einn pistilinn um Luis Garcia. Jermaine Pennant virðist vera vaxandi leikmaður, og hefur hann eflst, eftir því sem á tímabilið leið og var bara t.a.m. býsna sprækur í leiknum í gærkvöldi. Hann reyndar, ásamt Mascherano, menn leiksins í gær að margra mati og get ég fyllilega tekið undir það. En jæja, að framlínunni, mér væri svo nákvæmlega sama um það, ef ég læsi um það að öll sóknarlínan hjá Liverpool færi frá Anfield. Craig Bellamy, Peter Crouch og Dirk Kuyt eru bara ekki búnir að standa sig nægjanlega vel á klúbbnum og kæmi mér það verulega á óvart, ef Benitez skipti a.m.k. ekki tveimur af þeim út fyrir nýja menn.

Liverpool hefur gengið frá kaupum á einum leikmanni, sá heitir Lucas og er hann brasilískur landsliðsmaður, spilar sem fyrirliði Gremio. Þessi leikmaður á víst að vera rosalega efnilegur, en hverjir eru það ekki sem keyptir eru þarna frá S-Ameríku til Evrópu. Þeir sem nefndir hafa verið oft og títt undanfarna mánuði, eða síðan Gillett og Hicks tóku við Liverpool, eru m.a. Samuel Eto, David Villa, Fernando Torres og auðvitað talsvert fleiri. Rafael Benitez hefur sagt það að til þess að fá gæðaleikmenn, þarf að klófesta þá strax og er það auðvitað hárrétt hjá honum.
 
Vangaveltur fyrir næsta tímabil

Ljóst er að ef Liverpool fær til sín, e-ð af heimsklassaleikmönnum þá verða þeir í titilbaráttunni heima fyrir næsta tímabil 2007/8. Ég ætla a.m.k. að spá þeim velgengni á næsta tímabili, með breiðari leikmannahóp og sterkari, og "ruslið" verði horfið af braut. Ég spái þeim því englandsmeistaratitli og sigri í deildarbikarnum á næsta tímabili. Því að þrátt fyrir vonbrigðin í gærkvöldi, þá eru bjartir tímar framundan hjá sigursælasta liði bretlandseyja, með tilkomu nýrra eiganda, sem eiga fyrir dýfu á ísinn sinn.